Protocolu frente a les agresiones machistes

¿Por qué un protocolu contra les agresiones?

Tener un protocolu nun colectivu que se define feminista ye dalgo positivo na midida que supón dar importancia a la llucha contra les agresiones machistes y dir más allá de les simples declaraciones. Arrancamos de la idea de qu’en cualquier organización mista, nuna sociedá como la nuestra, pueden producise agresiones a persones por una cuestión de xéneru. Identificar eses agresiones y poner midides pa que nun caigan na impunidá ye un pasu lóxicu en cualquier ámbitu nel que se lluche escontra esta llaceria. De la mesma manera, si se busca una participación igualitaria nes reuniones y pa tomar decisiones, lo lóxico ye intentar que nes asamblees haya dinámiques que favorezan les intervenciones de les muyeres y que se detecten actitúes sexistes pa que desapaezan.

¿Qué ye violencia machista?

Una agresión machista ye una agresión (física, psicolóxica, afectiva, sexual o económica) exercida por un suxetu masculinizáu sobre muyeres, menores o persones con una identidá de xéneru y/o sexualidá distinta a la normativa.

Son agresiones machistes toes aquelles que s‘enmarquen dientro de la violencia estructural patriarcal, exercíes de manera puntual o de contino, cola intención de someter –sea de forma consciente o inconsciente- por medios físicos o psicolóxicos, incluyendo amenaces, intimidación o coacción, xenerando dañu o sufrimientu, tanto si se dan nel ámbitu públicu como nel priváu.

Cómo actuar énte una agresión

1. Si sufriste una agresión o te sientes nuna situación d’acosu: avérate a la barra y avisa a la persona que tea de turnu pa que t’acompañe no que necesites y s’espulse al agresor del centru social.
2. Si presencies o tas nel centru cuando asocede una agresión: avérate a la persona agredida con prudencia (cuando nun tea cerca la persona agresora) pa pregunta-y qué necesita. Nun incomodes, espongas nin fuercies a l’agredida na so decisión, respeta los sos tiempos. Siempre se va a intentar dialogar enantes, indicando-y al agresor que tien que salir del espaciu y el motivu. Van evitase les confrontaciones directes na midida de lo posible y pa ello’l grupu de diálogu va tar formáu por persones que se sientan capaces d’encariar la situación de manera coherente y priorizando situaciones non violentes que miren por nun reproducir lóxiques patriarcales. En casu de plantar resistencia y xenerase una situación tensa, párase la música o l’eventu hasta conseguir qu’esa persona abandone l’espaciu. Una vez fecha la espulsión, va recordase que nun se permiten actitúes machistes nin agresiones de la triba que sean.
3. Si llega información sobre una persona que vien habitualmente al Centru o va a participar nuna actividá y cuenta con acusaciones por violencia machista va falase tanto con esa persona como col colectivu al que pertenez p’aclarar el tema y, nel casu de les actividades, ta la opción de proponer al colectivu qu’asista otra persona al eventu.

Cómo actuar como asociación depués de l’agresión.

Nel casu de que dalguién dea a conocer un casu de violencia ye imprescindible intervenir lo más rápido que se pueda. Pa ello habíemos cuntar colos preseos necesarios pa poder actuar ensin necesidá de retrasos qu’estropien les relaciones humanes. Ye fundamental actuar con empatía, evitar la rumoroloxía, los xuicios o versiones paraleles, asina como’l respetu a la intimidá de la persona agredida tanto presencialmente como al traviés de los chats de comunicación interna del CSA.

Proponemos:

1. La creación de dos comisiones. Una qu’apoye a la persona agredida y otra que contacte cola persona agresora.
2. Estes comisiones van tar formaes por tres persones caúna. Taríen compuestes por dos muyeres y un home (a poder ser del grupu d’homes que trabayen les nueves masculinidaes qu’había nel centru).
3. Cualquier comisión pue pidir la participación d’otra persona ayena que facilite la comunicación coles persones implicaes nos fechos. Trátase tanto de xenerar confianza y seguridá cola agredida, como de facilitar el diálogo cola persona agresora.
4. Si l’agresor diz que se lu acusa en falso, tien d’aceptar igualmente trabayar cola comisión hasta que tea resuelta la situación.
5. Les comisiones van ellaborar una propuesta sobre les midíes a tomar que se va llevar a l’asamblea pa la so aprobación, si procede. Convocaríase una asamblea estraordinaria si fixera falta. Mentes el procesu, pue limitase l’accesu al CSA al agresor. Esto respondería tanto a la necesidá de la persona agredida (por mieu, vergoña, etc.) o porque dalguna otra persona del grupu se sienta incómoda y nun quiera compartir espacios col agresor.
6. Sean cuales sean les midíes que tomen les comisiones, una parte clave del procesu ye’l seguimientu de cómo tán funcionando los alcuerdos, porque pueden cambiar les circunstancies o pue comprobase na práctica que les decisiones tomaes nun tán funcionando como s’esperaba y nun son útiles, polo que les comisiones han volver a xuntase pa cambiales en diálogu y consensu coles persones afectaes.
7. Mentes dura tol procesu ye mui importante dexar trabayar a les persones implicaes na resolución del asuntu. Si dalguién considera que tien aportaciones que facer tien de falar con una de les comisiones formaes y nun actuar pela so cuenta, anque sea de “buena fe”. Tou tipu d’interferencia pue facer esbarrumbar el trabayu fechu y tenemos que danos cuenta de qu’esti pue durar munchu tiempu.
8. Formar parte d’una d’estes comisiones había de ser responsabilidá de toles persones asociaes al CSA, polo qu’había ser rotativo, anque con una duración significativa, por exemplu, un añu.
9. Dientro d’estes comisiones había trabayase teniendo en cuenta que:
   1. Nun se pue presionar a la persona agredida faciéndola que cuente los detalles de l’agresión nin que revele’l nome de la persona agresora. Tampoco se pue xulgar pol tiempu que tardó en denunciar l’agresión. Hai que respetar el ritmu de la persona afectada.
   1. L’agresión baxo la influencia de les drogues o l’alcohol nunca va sirvir como escusa de lo asocedío. Hemos de ser conscientes de cómo nos afecta’l consumu d’estes sustancies y asumir la responsabilidá de los nuestros comportamientos.
   1. Si la persona agresora tien una actitú cola qu’intenta xustificar los sos actos y/o nun ta dispuesta a facer un trabayu personal pa cambiar les sos actitúes y comportamientos machistes, nun se la va aceptar nel espaciu nunca.
   1. Una persona puede cambiar les sos actitúes y comportamientos sexistes si ta dispuesta y fae un trabayu personal. Esti procesu había facelu fuera del espaciu y respetando los límites y les necesidades de la persona agredida.

Énte otru tipu de conflictos y agresiones:

Actuar con perspectiva de xéneru y dende una óptica feminista implica apostar por otres formes de tar nel mundu y de resolución de conflictos. La fuercia física o l’autoritarismu son la respuesta habitual énte situaciones de tensión y violencia, pero existen otres maneres de xestionar estos conflictos, principiando pola prevención. Lo mesmo que nos casos nos que se presencie una agresión machista, va apostase pol diálogu cola persona o persones afectaes, siempre dende la discreción y  el respetu, y van buscase víes al traviés del diálogu pa evitar que xurda un episodio violentu.

Pa ello, va contactase cola persona que tea de turnu pa xestionar la situación y buscar ayuda si fae falta. En casu de que’l diálogu nun dea resultaos, va a comunicase a la persona o persones que tengan actitúes violentes qu’han d’abandonar l’espaciu. Si la situación sigue, va buscase ayuda ente les persones que tean nel CSA y va parase l’actividá que se tea faciendo hasta que se resuelva la situación o la persona o persones que tengan actitúes violentes abandonen el Centru.

Campaña de difusión ente les persones socies del Centru Social

Una vez aprobáu’l protocolu d’actuación, ye imprescindible qu’esti sea conocíu por toles persones que pertenecemos al CSA. Pa ello ye necesaria una campaña de difusión que contemple dos aspectos:

1. Visualizar en L’Apiaderu que s’entra nun espaciu seguru y llibre d’agresiones machistes. Ello implica poner carteles bien visibles, con criteriu estéticu, que favorezan falar d’esti tema tanto ente les persones socies como les que non.
2. Difundir ente tolos miembros tanto la existencia de les comisiones y quien les formen (pa poder contactar si fae falta) como los criterios que tenemos a la hora de definir qué ye una agresión machista, los diferentes tipos d’agresiones que se pueden dan (pa incluyir micromachismos que nun son percibíos dacuando). Trátase de qu’esti protocolu nun sea namás p’actuar de manera punitiva respecto a los agresores, sinón de que sea tamién formativu y nos ayude a percibir actitúes y comportamientos qu’anque tean “normalizaos socialmente” son igualmente machistes y polo tanto contribúin a xenerar desigualdá y violencia.